അക്ഷയ സെന്ററിന്റെ പിഴവ്: ഒരു പൂജ്യം പിഴച്ചു വിദ്യാര്‍ഥിനിയുടെ ഭാവി പ്രതിസന്ധിയില്‍

പാലക്കാട്:അക്ഷയ സെന്ററിന്റെ പിഴവ് മൂലം പാലക്കാട് മണ്ണാർക്കാട് പൊറ്റശ്ശേരി സ്വദേശിനിയായ വിസ്മയ എന്ന വിദ്യാർഥിനിയുടെ ഭാവി ഇപ്പോള്‍ തുലാസിലാണ്.

അക്ഷയ കേന്ദ്രത്തിന്റെ ഒരു ചെറിയ പിഴവാണ് ഈ പ്രതിസന്ധിക്ക് കാരണം. പ്ലസ് ടു പഠനം പൂർത്തിയാക്കിയ വിസ്മയ, നഴ്സിങ് പ്രവേശനത്തിനായി വരുമാന സർട്ടിഫിക്കറ്റിന് അപേക്ഷ നല്‍കിയിരുന്നു. എന്നാല്‍, അപേക്ഷയില്‍ വരുമാനം തെറ്റായി രേഖപ്പെടുത്തിയതോടെ, സംവരണം ഉള്‍പ്പെടെയുള്ള ആനുകൂല്യങ്ങള്‍ നഷ്ടപ്പെടാനുള്ള സാധ്യതയാണ് ഈ വിദ്യാർഥിനിയെ കാത്തിരിക്കുന്നത്.

വില്ലേജ് ഓഫീസില്‍ നിന്ന് ലഭിച്ച വരുമാന സർട്ടിഫിക്കറ്റില്‍ വിസ്മയയുടെ കുടുംബ വാർഷിക വരുമാനം 66,000 രൂപയായാണ് രേഖപ്പെടുത്തിയിരുന്നത്. ഈ സർട്ടിഫിക്കറ്റുമായി അക്ഷയ കേന്ദ്രത്തില്‍ എത്തി, എല്‍ ബി എസ് നഴ്സിങ് പ്രവേശനത്തിനുള്ള അപേക്ഷ പൂർത്തിയാക്കി. എന്നാല്‍, അപേക്ഷയില്‍ വരുമാനം 6,60,000 രൂപയായി തെറ്റായി രേഖപ്പെടുത്തുകയായിരുന്നു. ഒരു പൂജ്യം അധികം ചേർത്തതോടെ, വരുമാനം ആറ് ലക്ഷം രൂപ അധികമായി കണക്കാക്കപ്പെട്ടു. ഈ പിഴവ്, വിസ്മയയുടെ പ്രവേശന സാധ്യതകളെ ബാധിക്കുന്നതിന് കാരണമായി.

പിഴവ് കണ്ടെത്തുമ്ബോഴേക്കും അപേക്ഷ തിരുത്താനുള്ള സമയപരിധി കഴിഞ്ഞിരുന്നു. ഇതോടെ, സംവരണ ആനുകൂല്യങ്ങള്‍ നഷ്ടപ്പെടാനുള്ള സാഹചര്യമാണ് വിസ്മയയെ കാത്തിരിക്കുന്നത്. അതേസമയം, അക്ഷയ കേന്ദ്രം തങ്ങളുടെ ഭാഗത്ത് പിഴവ് സംഭവിച്ചതായി സമ്മതിക്കുന്നു. അപേക്ഷയുടെ പകർപ്പ് വിദ്യാർഥിക്ക് നല്‍കിയിരുന്നുവെന്നും, തിരുത്തലിന് ആവശ്യമായ സമയം ലഭ്യമായിരുന്നുവെന്നുമാണ് അക്ഷയ കേന്ദ്രത്തിന്റെ വിശദീകരണം. എന്നിരുന്നാലും, ഈ സാഹചര്യം വിസ്മയയുടെ ഭാവിയെ ബാധിച്ചിരിക്കുകയാണ്.